«Իտալիայի ժամանակակից արվեստի հիմնադրամի նախաձեռնությամբ ու ՀՀ մշակույթի նախարարության և Իտալիայի մշակութային ժառանգության, մշակութային գործունեության և տուրիզմի նախարարության, ինչպես նաև ՀՀ արտաքին գործերի նախարարության աջակցությամբ , Հայաստանում առաջին անգամ կբացվի «Ժամանակակից արվեստի միջազգային ցուցահանդես. Հայաստան 2018» խորագրով»:
2018-ի սեպտեմբերի 25-ին Երևանում կայանալիք հայ-իտալական մշակութային աննախադեպ նախաձեռնության մասին այսօր հայտարարեց մշակույթի նախարար Արմեն Ամիրյանը: Մամուլի ասուլիսին ներկա ՀՀ-ում Իտալիայի Հանրապետության արտակարգ և լիազոր դեսպան Ջովանի Ռիչուլին նախաձեռնությունը որակեց չափազանց կարևոր՝ մշակութային հարուստ անցյալ ունեցող այնպիսի երկրների համար, ինչպիսիք են Հայաստանն ու Իտալիան:
«Մենք միշտ խոսում ենք մշակութային անցյալից: Սա մի միջոց է, որով խոսելու ենք ներկայի մասին՝ մշակույթի լեզվով»,-ասաց Իտալիայի դեսպանը:

«Այն, ինչ նախկինում ընդամենը միտք էր, այսօր արդեն նախագիծ է». «Շաուլա Ինթերնեյշնլ» ՍՊԸ-ի համահիմնադիր Ալբերտո Կալիոստրոն ներկայացրեց սպասված նախագծի լոգոյի իմաստը՝ գրկախառնված երկու մարդ. մեկը՝ հյուրընկալ Հայաստանը, որն իր գիրկն է առնում աշխարհի տարբեր անկյուններից այցելած հյուրերին:
«Դարավոր պատմություն ու մշակույթ ունեցող երկու երկիր, որոնք նաև քրիստոնեության օրրան են: Հայաստանի ու Իտալիայի միջև եղած այս կապից ծնված գաղափար, որը կտարածվի նաև բոլոր մայրցամաքներում». Իտալիայի ժամանակակից արվեստի հիմնադրամի գլխավոր տնօրեն Ստեֆանո Ապուցցոյի մեկնաբանությունն էր:

Ցուցահանդեսի հայաստանյան համադրող Մարինա Հակոբյանի խոսքով, մշակութային յուրաքանչյուր նախագիծ ունի, կամ առնվազն՝ պե՛տք է ունենա կոնկրետ նշանակետ, գաղափար, իմաստ՝ ի՞նչ նպատակով է այն կազմակերպվում, ի՞նչ նորություն է բերելու, ի՞նչ ներդրում է ունենալու մշակութային ասպարեզում:
«20-րդ դարը նշանավորվեց 1900 թվականին Փարիզում բացված համաշխարհային ցուցահանդեսով: Այն ունեցավ շուրջ 50 միլիոն այցելու, որը երկար տարիներ չգերազանցված էր: Մասնակցում էր 75 հազար արվեստագետ՝ 35 երկրից: Եվ ի՞նչ բերեց համաշխարհային այս ցուցահանդեսը՝ «մոդեռն» ոճ ամբողջ աշխարհին: Այսինքն, այն ուներ իր առաքելությունը, որը և կատարեց»:
Ըստ համադրողի, Երևանում կայանալիք ցուցահանդեսը ևս ունի առաքելություն ու կոնկրետ նշանակետ՝ մշակութային տարբեր մտածողությունները համախմբել ու տեսնել մեկ հարթակում: Ցուցահանդեսի ողջ ընթացքում Հայաստանի պատմությունն ու մշակույթը կներկայացվի տարբեր երկրներում: Այդպիսով, տեղի կունենա նաև մշակութային փորձի փոխանակում: Մարինա Հակոբյանի բնորոշմամբ՝ հրաշալի հնարավորություն մեկ անգամ ևս ամրապնդելու մշակութային կապերը ոչ միայն Իտալիայի, այլև տարբեր երկրների հետ:
ՀՀ արտաքին գործերի նախարարի տեղակալ Ռոբերտ Հարությունյանը միջոցառումը կարևորում է մի քանի պատճառով.
«Այս ցուցահանդեսի միջոցով Հայաստանը հնարավորություն կունենա ներկայացնելու իր արվեստը և ծանոթանալու այն ամենին, ինչ կատարվում է համաշխարհային ասպարեզում: Միջոցառումը խիստ ներկայացուցչական է, քանի որ ակնկալում ենք արվեստագետների հոսք աշխարհի ամենատարբեր երկրներից: Սեպտեմբերի 25 – ից հոկտեմբերի 25-ն անցկացվող այս միջոցառումը համընկնում է հոկտեմբերին Հայաստանում անցկացվելիք Ֆրանկոֆոնիայի գագաթաժողովի օրերին: Այդ առիթով Հայաստան այցելած մեր հյուրերին, նաև ցուցահանդեսի միջոցով, կարող ենք ցույց տալ, որ Հայաստանն իր ուրույն դերն է տեսնում գլոբալ աշխարհում՝ նաև մշակույթի միջոցով»,-ասաց Ռոբերտ Հարությունյանը:

Սեպտեմբերին կայանալիք ցուցահանդես-փառատոնն իր տարբեր բաժիններով բաշխված կլինի մայրաքաղաքի խոշորագույն մշակութային օջախներում: Դրանց թվում են՝ Երևանի օպերային թատրոնը, Գաֆէսճեան արվեստի կենտրոնը, Հայաստանի նկարիչների միության ցուցասրահը և այլն:
Լայնածավալ ծրագիրը կընդգրկի կերպարվեստի բոլոր տեսակները: Ծրագրի կոնցեպտուալ հիմքում բազմաժանրությունն է և մշակութային տարբեր մտածողությունների համադրումը:
Ցուցահանդեսը կուղեկցվի մշակութային տարբեր միջոցառումներով, կհրատարակվի ալբոմ-պատկերագիրք:
Նախագիծն իրականացվում է «Շաուլա Ինթերնեյշնլ» ՍՊԸ-ի հետ համատեղ, որի գրասենյակը՝ այսուհետ պատասխանատու վերոնշյալ ցուցահանդեսի համար, կտեղակայվի «Էլիտ Պլազա» բիզնես կենտրոնի 4-րդ հարկում: Գրասենյակը բաց կլինի 2018թ. մարտի 1-ից:
Առավել մանրամասն տեղեկատվության և ցուցահանդեսին մասնակցության հայտը լրացնելու համար խնդրում ենք այցելելwww.icaearmenia.org կայք: Հայտերն ընդունվում են 2018թ. մարտի 1-ից ապրիլի 31-ը: